Reiðin mín og reiðin þín.

Ég á erfitt með að lýsa þeirri reiði sem virðist fara í hringi eftir því sem dagarnir líða eftir að fjörið byrjaði. Einn daginn hugsa ég til þeirra sem fengu að leika lausum hala í eignartilfærslu og huglægum  eignarmyndarleik. Suma daga hugsa ég til þeirra sem áttu að hafa vitið og höfðu tækin til að stoppa hina í vitleysunni. Aðra hugsa ég um stjórnmálamennina sem virðast lifa í ímynduðum heimi hamingjunnar.

Af einhverjum ástæðum hefur reiðin ekki beinst að Björgólfi þeim yngri. Hvers vegna veit ég ekki. Kannski á hann skilið að fá smá reiði eins og við hin öll.  Reiðin virðist blunda í honum líka. Skiljanlega.

Ég var svo heppinn að komast af landi brott og náði að mestu að losna við reiðina og áhyggjurnar sem hefur verið að blunda í mér undanfarið. Það er ekki laust við að maður náði að soga í sig tilveru þar sem manni leið aftur eins og manneskju. Ein undartekning var þó: maður lét sig nægja að líta á vörurnar í búðargluggunum. Fólk hefur kannski gott af því að læra hógværð í eyðslu, kreppa er góð leið til þess, kannski ekki sú skemmtilegasta.

Nóg um það, tölum um leynd, leynimakk og þá taktík sem hefur verið beitt í upplýsingaflæðinu í kreppunni.

Mér finnst það óafsakanlegt að hér skuli stjórnmálamenn sem við völdum til að starfa í okkar þágu komast upp með það ítrekað að ljúga og leyna staðreyndum upp i opið geðið á okkur aftur og aftur.
Mér finnst það jafnvel verra að við virðumst ætla að leyfa þeim að komast upp með það.

Það litla sem okkur hefur verið sagt segir ekki neitt. "Grunnstoðir þjóðfélagsins eru sterkar" hefur margoft komið fram. Einmitt, frábært að hafa stoðirnar sterkar þegar mokað er frá þeim úr öllum áttum. Kannski verður friðarsúlan eina stoðin sem við getum gengið að vísu næstu árin. Hún ljómar þó.

Svo er hægt að tala um "BANNORÐIÐ"

Atvinnuleysi 

Ég held að það hafi tekið 2 vikur fyrir hagfræðinga, viðskiptafræðinga og stjórnmálamenn að þora segja að hér verði 10-15% atvinnuleysi. Aftur og aftur hef ég horft á viðtalsþætti þar sem okkar einstaklega lélegu fréttamenn hafa gert smá tilraun til að fiska þessar tölur upp. Það er eins og enginn þori að segja hvað muni gerast hér. 

Við vitum alveg hvað er að gerast. Allt í kring um okkur er fólk að fá uppsagnarbréf. Þetta er ekkert feimnismál, það þarf einfaldlega að tala um þessa hluti. 

Einhver verður að koma fram og koma því fram á mannamáli hvað þetta ástand þýðir fyrir okkur sem þjóðfélag. Ekki verður það falleg frásögn, en hún verður að koma fram.

Öll sú atburðarrás sem við erum að upplifa er með ólíkindum, eins og Björgólfur segir svo fínt þá er skelfingin rétt að byrja. 

Okkar stjórnmálamenn skulda, þeir skulda mér og þeir skulda þér. Við eigum inni sannleikann hjá þeim og hann vill ég fá til baka með vöxtum.

Misráðin ákvörðun sem endaði með skelfingu